di Sant'Alfonso M. de' Liguori (1758) (un interessante saggio di Renato Caserta sulla Pastorale e su S. Alfonso è disponibile alla voce "altro" su questo stesso sito in 'Tradizioni Natalizie e altro') Quanno nascette Ninno a Bettalemme Era nott', e pareva miezo juorno Maje le Stelle - lustre e belle Se vedetteno accossì: E a cchiù lucente Jett'a chiammà li Magge all'Uriente. De pressa se scetajeno l'aucielle Cantanno de na forma tutta nova: Pe 'nsì agrille - co li strille, E zombanno a ccà e a llà; E' nato, è nato, Decevano, lo Dio, che nc'à criato. Co tutto ch'era vierno, Ninno bello, Nascetteno a migliara rose e sciure. Pe 'nsì o ffieno sicco e tuosto Che fuje puosto - sott'a Te, Se 'nfigliulette, E de frunnelle e sciure se vestette. A no paese che se chiamma Ngadde, Sciurettero le bigne e ascette l'uva. Ninno mio sapuritiello, Rappusciello - d'uva sì Tu; Ca tutt'amore Faje doce a vocca, e po mbriache o core. No nc'erano nemmice pe la terra, La pecora pasceva co lione; Co o caprette - se vedette 0 liupardo pazzeà; L'urzo e o vitiello E co lo lupo 'n pace o pecoriello. Se rrevotaje nsomma tutt'o Munno, Lu cielo, a terra, o mare, e tutt'i gente. Chi dormeva - se senteva Mpiett'o core pazzeà Pe la priezza; E se sonnava pace e contentezza. Guardavano le ppecore i Pasturi, E n'Angelo sbrannente cchiù do sole Comparette - e le decette: No ve spaventate no; Contento e riso La terra è arreventata Paraviso. A buje è nato ogge a Bettalemme Du Munno l'aspettato Sarvatore. Dínt'i panni o trovarrite, Nu potite - maje sgarrà, Arravugliato, E dinto a lo Presebio curcato. A meliune l'Angiule calare Co chiste se mettetten'a cantare: Gloria a Dio, pace 'n terra, Nu cchiù guerra - è nato già Lo Rre d'amore, Che dà priezza e pace a ogni core. Sbatteva o core mpietto a ssi Pasture; E l'uno 'nfaccia all'auto diceva: Che tardammo? - Priesto, jammo, Ca mme sento scevolì Pe lo golio Che tengo de vedè sso Ninno Dio. Zombanno, comm'a ciereve ferute, Correttero i Pasture a la Capanna; Là trovajeno Maria Co Giuseppe e a Gioja mia; E 'n chillo Viso Provajeno no muorzo i Paraviso. Restajeno ncantate e boccapierte Pe tanto tiempo senza dì parola; Po jettanno - lacremanno Nu suspiro pe sfocà, Da dint'o core Cacciajeno a migliara atte d'amore. Co a scusa de donare li presiente Se jetteno azzeccanno chiano chiano. Ninno no li refiutaje, L'azzettaje - comm'a ddì, Ca Ile mettette Le Mmane ncapo e li benedicette. Piglianno confedenzia a poco a poco, Cercajeno licenzia a la Mamma: Se mangiajeno il Pedille Coi vasille - mprimmo, e po Chelle Manelle, All'urtemo lo Musso e i Mascarielle. Po assieme se mettetteno a sonare E a cantà cu l'Angiule e Maria, Co na voce - accossì doce, Che Gesù facette: a aa... E po chiudette Chill'uocchie aggraziate e s'addormette. La nonna che cantaieno mme pare Ch'avette a esse chesta che mò dico. Ma nfrattanto - io la canto, Mmacenateve de stà Co li Pasture Vecino a Ninno bello vuje pure. "Viene suonno da lo Cielo, Vien'e adduorme sso Nennillo; Pe pietà, ca è peccerillo, Viene suonno e non tardà. Gioia bella de sto core, Vorria suonno arreventare, Doce, doce pe te fare Ss'uocchie bell'addormentà. Ma si Tu p'esser'amato Te si fatto Bammeniello, Sulo amore è o sonnariello Che dormire te po fa. Ment'è chesto può fa nonna, Pe Te st'arma è arza e bona. T'amo, t'a... Uh sta canzona Già t'ha fatto addobeà! T'amo Dio - Bello mio, T'amo Gioja, t'amo, t'a... ". Cantanno po e sonanno li Pasture Tomajeno a le mantre nata vota: Ma che buò ca cchiù arrecietto Non trovajeno int'a lu pietto: A o caro Bene Facevan'ogni poco ò va e biene. Lo nfierno sulamente e i peccature Ncocciuse comm'a isso e ostinate Se mettetteno appaura, Pecchè a scura - vonno stà Li spurteglíune, Fujenno da lo sole lì briccune. Io pur songo niro peccatore, Ma non boglio esse cuoccio e ostinato. Io non boglio cchiù peccare, Voglio amare - voglio stà Co Ninno bello Comme nce sta lo voje e l'aseniello. Nennillo mio, Tu sì sole d'amore, Faje luce e scarfe pure o peccatore; Quanno è tutto - niro e brutto Comm'a pece, tanno cchiù Lo tiene mente, E o faie arreventà bello e sbrannente. Ma Tu mme diciarraje ca chìagniste, Acciò chiagnesse pure o peccatore. Aggio tuorto - haje fosse muorto N'ora primmo de peccà! Tu m'aie amato, E io pe paga t'aggío maltrattato! A buje, uocchie mieje, doje fontane Avìte a fa de lagreme chiagnenno Pe Ilavare - pe scarfare Li pedilli di Gesù; Chi sa pracato Decesse: via, ca t'aggio perdonato. Viato me sì aggio sta fortuna! Che maje pozzo cchiù desiderare? 0 Maria - Speranza mia, Ment'io chiagno, prega Tu: Penza ca pure Sì fatta Mamma de li peccature. |
