L'eco luntano
che chiano se perde
d''o suono 'e nuvena
ce porta na nota
'ntunata d''a musica
doce 'e Natale.
Pe' ll'aria
prufumo 'e dicembre
l'addore d''e ppigne
p''e vvie
frasturnate 'e rummore
na smania 'e sereno
e l'uocchie
s'aizeno 'ncielo
cercanno na lampa cchiu' nova
ca desse a stu munno
cuncreta certezza
ca desse a nu suonno
vacante 'e speranza
chiarore 'e n'at'alba,
n'at'alba...n'at'alba...

Luciano Somma (Natale 1983)