E' nu ricamo 'o suono 'e na zampogna
ca vene 'a miez''a via,fredda e sulagna,
e dint'a chesta casa chiena 'e luce,
quanti ccose se stanno appriparanno.

Nannina sta facenno 'e zeppullelle
'e cavule e ricotta mentre 'o nonno
smiccéa scapuzzianno 'ncopp''a seggia
'o nennillo ca 'o tira p''o cazone.

Mammema sta taglianno 'o capitone.
Papa' sbarianno attuorno a stu presebbio,
smanea pa' fa' appiccia' na lampadina
senza addunarse ca s'e' fulminata.

E pe' tramente 'o viento tuppettea
'nfaccia 'e llastre,io sento dint''o core
nu tremmulio,nu spànteco,na freva,
n'arteteca me frezzechèa 'int''e vvene.

E sfrenneséo,guardanno chistu vico,
me pare d''o vedè ammantato 'e janco
isso,ch'e' stato sempe puvieriello,
all'uocchie mieie mo pare nu rignante.

'A campana d''a chiesia d''a Cuncordia
mo gia' se fa' senti',sunanno a ffesta,
manca nu quarto d'ora a mezanotte,
sorema guarda fore a' na fenesta...

-'O pranzo e' pronto -Nanninella allucca
v'arraccumanno stu giarrone 'e vino
si non po' doppo cca' se fa 'a cummeddia;
pircio' cercammo 'e nun ce 'ntusseca'.

Ninno mo dorme 'mbraccio a mammarella
dint''a stanza tutto e' silenzio attuorno,
io guardo chesta scena,comm'e' bella!
Sta pace 'int''a famiglia comm'e' doce!

Ma 'o nonno rompe stu silenzio 'e ggelo
e' 'o cchiu' abbasato e dice cose sante:
"E' nato 'o figlio 'e Ddio,Nostro Signore!"
...E ce facimme 'a croce tutte quante.

Luciano Somma (1960)